22 زبانوں میں تِروکُّرل

உருவத்தில் முழுவதும் மக்களைக் கயவர் ஒத்திருப்பர்; இத்தகைய ஒப்பினை யாம் வேறெங்கும் கண்டதில்லை.

தமக்கு உறுதியானவற்றை அறிபவர்களில் அவற்றை அறியாத கயவர்கள் நன்மை உடையராவர். ஏனெனில், அவர்கள் அதுபற்றித் தம் நெஞ்சில் கவலைகொள்ளாதவராவர்.

கயவர் தேவரையொத்த தன்மையர்; ஏனெனில், தேவரைப்போன்று, கயவரும் கேட்பார் யாருமின்றித் தாம் விரும்புவன யாவற்றையும் செய்து ஒழுகுவார்.

கீழோர் தம்மிலும் குறைந்தபடியாய் ஒழுகுவாரைக் கண்டால் அவ்வொழுக்கத்தில் தாம் அவரினும் மேம்பட்டு, அதனால், தம் உயர்வைக்காட்டி இறுமாப்படைவர்.

கயவரிடம் நல்லொழுக்கம் காணப்படுமாயின் அதற்குக் காரணம் அரசரால் தமக்குத் துன்பம் நேருமென்னும் அச்சமே. அதைத்தவிர, தம்மால் விரும்பப்படும் பொருள் கிடைக்குமாயின் அதனால் சிறிது உண்டாகும்.

தாம் கேட்ட மறைகளைப் பல இடங்களுக்குக் கொண்டுசென்று, பிறர்க்குச் சொல்லுவதால் கயவர், அறையப்படும் பறையினை ஒத்தவராவர்.

தம் கொடிறு உடைக்கும் முறுக்கிய கையினை உடையவர் அல்லாதார்க்குக் கயவர் தாம் உண்டு கழுவிய கையைத் தெறித்தலும் செய்யார்.

வறியவர் சென்று தம்குறையைச் சொல்லியவுடன் மேலோர் இரக்கம்கொண்டு உள்ளது கொடுப்பார்; கரும்புபோல வலியவர் நைய நெருக்கினால்தான் கீழோர் உள்ளது கொடுப்பார்.

பிறர் செல்வச்செழிப்பால் பட்டும் துகிலும் உடுத்தலையும், பாலோடு உணவு உண்டலையும் கீழோர் காணுமானால் அவற்றைப் பொறாமல், அவரிடம் பழி இல்லாதபோதும் அதனை உண்டாக்கவல்லவராம்.

கயவர் ஏதாவதொரு துன்பம் அடையும்போது அதுவே பற்றுக்கோடாக விரைந்து தம்மை விற்றற்கு உரியர். அதுவல்லாமல் வேறு எத்தொழிலுக்கு அவர் உரியராவர்? கயவர் எத்தொழிலுக்கும் உரியவர் அல்லர்.