22 ਭਾਸ਼ਾਵਾਂ ਵਿੱਚ ਤਿਰੁੱਕੁਰਲ

அடர்ந்த, அழகிய கூந்தலையுடைய இப்பெண் இங்கு வாழும் தெய்வமகளோ? தேர்ந்தெடுத்த மயிலோ? அல்லது ஒரு மானுடப் பெண்ணோ? யாரென்று முடிவுசெய்ய இயலாது என் நெஞ்சம் மயங்கும்.

பேரழகுகொண்ட இவள் என் நோக்கிற்கு எதிர்நோக்குதல், தானே தாக்கித் துன்புறுத்தக்கூடிய தெய்வமகள் படையையும் உடன் அழைத்து வந்ததுபோலும் தன்மையை உடையது.

கூற்று என்று சொல்லப்படுவதை நான் முன்னாட்களில் பிறர் கூறக் கேட்டு அறிந்திருக்கிறேன்; பார்த்து அறிந்ததில்லை. இப்பொழுதுதான் பார்த்து அறிகிறேன். அது பெண்ணுக்குரிய பண்புகளுடன் பெரிய கண்களையும் உடையதாகும்.

பெண்ணுக்குரிய பண்புகளுடன்கூடிய இவளுக்குக் கண்கள் தம்மைக் கண்டவரின் உயிரை உண்ணும் தோற்றத்துடன் மாறுபட்டு அமைத்திருந்தன.

என்னைத் துன்புறுத்தலால் கூற்றமோ? என்னைப் பார்த்தலால் கண்ணோ? வெருவுதல் உடைமையால் மானோ? என்னால் உண்மையை அறிய இயலவில்லை. இப்பெண்ணது கண்களின் நோக்கம் இம்மூன்று தன்மைகளும் பெற்றதாய் உள்ளது.

கொடும்புருவங்கள் செம்மை உடையனவாய் மறைத்தால் அவற்றையும் தாண்டி இவள் கண்கள் எனக்கு நடுங்கச்செய்யும் துயரத்தைத் தரமாட்டா.

இப்பெண்ணின் சாய்தலற்ற முலைகளின்மேல் போடப்பட்ட துகில் மதங்கொண்ட களிற்றின்மேலிட்ட கண்ணை மறைக்கும் முகபடாத்தினை ஒக்கும்.

போர்க்களத்திற்கு வராத பகைவரும் வந்தவர் கூறுவதைக் கேட்டு அஞ்சுகின்ற என் வலிமை இப்பெண்ணின் ஒள்ளிய நுதலையும் தாங்க இயலாது அழிந்துவிட்டது.

மானையொத்த மடநோக்கையும், நாணத்தையும் உடையவளாகிய இவளுக்குத் தக்கவையாகிய இவ்வணிகள் அமைந்திருக்க, வேற்றுமையுடைய வேறு அணிகலன்கள் என்ன பயன் உடையவை?

மது அதனை உண்ணுவார்க்கு மட்டும் மகிழ்ச்சியைத்தருவது அல்லாமல் காமம்போலக் கண்டார்க்கு மகிழ்ச்சியைத் தருவது அன்று.