22 भासांनी तिरुक्कुरल

நல்லொழுக்கத்தில் நிலைத்துநின்று துறந்தவர்களது சிறப்பு, உயர்ந்த பொருள்கள் யாவற்றிலும் இதுவே உயர்ந்ததென்று வேண்டும் நூல்களின் முடிவாகும்.

துறவியரின் பெருமையை இவ்வளவினது என்று எண்ணால் கூறமுயல்வது, இவ்வுலகில் பிறந்து இறத்தவர்களின் எண்ணிக்கையை அறியமுயல்வது போலாம்.

இம்மை, மறுமை என்னும் இரண்டின் இன்பதுன்பக் கூறுகளை ஆராய்ந்து அறிந்து, இப்பிறப்பில் துறவறம் மேற்கொண்டவரது பெருமையே உலகில் உயர்ந்தது. அரசர் முதலானோர் பெருமையைக் காட்டிலும் துறவியர் பெருமையே மேலானது.

மனவுறுதி என்னும் பாகனது தோட்டியால், யானைகளாகிய ஐம்பொறிகளையும் அவற்றின் புலன்களின்வழிச் செல்லவிடாது காப்பவன், வீடுபேறாகிய நிலத்திற்கு ஒரு நல்ல விதையாகுவான்.

ஐந்து புலன்களையும் அடக்கிய துறவியின் வலிமைக்கு, அகன்ற வானத்தில் உள்ளோரின் தலைவனாகிய இந்திரனே தக்க எடுத்துக்காட்டாவான்.

பெரியோர் எனப்படுவார் செய்தற்கு அரியவற்றைச் செய்பவர்; செய்தற்கு அரியவற்றைச் செய்ய இயலாதவர் சிறியர். இது இல்லறத்தார்க்கும் துறவறத்தார்க்கும் பொருந்துவதாகும்.

சுவை, ஒளி, ஊறு, ஓசை, நாற்றம் என்று சொல்லப்படும் ஐம்புலன்களின் தன்மையை ஆராய்ந்தறிய வல்லவன் இடத்ததே உலகமாகும்.

நிறைந்த மொழியினையுடைய துறவிகளின் உயர்வை, நிலவுலகில் அவரது ஆணையாகச் சொல்லப்பட்ட மந்திரங்களே தெளிவாகக் காட்டும்.

நற்பண்புகளாகிய குன்றின்மேல் நிற்கும் துறவியரின் சினம், அது நின்று நிலைக்கும் அளவு ஒருகணமேயானாலும், வெகுளப் பட்டவர்களால் அதைத்தடுத்து நிறுத்தி, அதிலிருந்து தப்பித்தல் இயலாததாகும்.

எல்லாவுயிர்களிடத்தும் அன்பும் அருளும் பூண்டு ஒழுகுதலால் அந்தணர் என்று சொல்லப்படுபவர் துறவியராவர்.