22 भासांनी तिरुक्कुरल

பொருளை விரும்பிக் குடிகளுக்குத் தொடர்ந்து தொல்லை தந்து அறமற்றவற்றைச் செய்யும் மன்னன், கொலைத்தொழிலைச் செய்வாரினும் கொடியவனாவான்.

கொடுங்கோல் மன்னன் குடிகளிடம் பொருள் வேண்டுவது, வழிப்பறிசெய்யும் கள்வன் ஒருவன் வேலைக் கையில்கொண்டு வழிச்செல்வாரிடம் பொருளைப் பறிப்பதுபோலாம்.

தன் நாட்டில் நிகழும் தீமைகளை நாள்தோறும் ஆராய்ந்து முறைமைசெய்யாத மன்னனின் நாடு நாள்தோறும் கெட்டழியும்.

பின்விளைவை எண்ணிப்பாராமல், முறையற்ற ஆட்சியை மேற்கொள்ளும் அரசன் ஈட்டிய பொருளையும் குடிகளையும் ஒருசேர இழப்பான்.

அரசனது தீச்செயலால் குடிகள் துன்பமுற்று, அதனைப் பொறுக்கமாட்டாமல் அழுத கண்ணீர் அவனது செல்வத்தைக் கடிதில் அழிக்கும் கருவியாகும்.

அரசர்க்குப் புகழ்களெல்லாம் நிலைபெறுதல் செங்கோல் ஆட்சியாலாம். அத்தகைய ஆட்சி இல்லையேல் அப்புகழ்கள் நிலைத்துநில்லா.

மழையில்லாமை உலகில் வாழும் உயிர்களுக்கு எவ்வகைத் துன்பத்தைக் கொடுக்குமோ, அவ்வகைத் துன்பத்தையே, மன்னனது இரக்கமின்மை அவனது நாட்டில் வாழும் குடிகளுக்குக் கொடுக்கும்.

முறைசெய்யாத அரசனது கொடுங்கோலின்கீழ் வாழ்ந்தால், யாவர்க்கும் பொருள் இல்லாமையினும் இருத்தல் இன்னாதது.

அரசன் முறைதவறிய ஆட்சியைச் செய்வானாயின், அவனது நாட்டில் பருவமழை பெய்யும் காலத்தில் பெய்யாது.

குடிகளைக் காத்தல் செய்யவேண்டிய அரசன் காப்பாற்றாது கொடுமைசெய்வானாயின், அவனது நாட்டில் பசுக்களும் பால்தரும் பயன்குன்றும்; ஆறு தொழில்களைச் செய்யும் அந்தணரும் நூல்களை மறந்துவிடுவர்.