22 زبانوں میں تِروکُّرل

இக்காமநோயைப் பிறர் அறிதலுக்கு நாணி நான் அதை மறைக்க முயன்றேன்; ஆனால், நீர்வேண்டுமென்று இறைப்பவர்க்கு ஊற்றுநீர் மிகுவதுபோல் அந்நோய் மேலும் மேலும் கொடிதாயிற்று.

இக்காமநோயை இங்குள்ளார் யாரும் அறியாமல் மறைத்தலையும் என்னால் செய்யஇயலவில்லை; நோய்க்குக் காரணமான காதலர்க்கு இதனைத் தெரிவித்தலும் எனக்கு நாணத்தைத் தரும். இனி நான் என்செய்வேன்?

காமநோயும், அதனை வெளியில் சொல்ல இயலாத நாணமும், அவற்றைச் சுமக்க இயலாத என் உடம்பில், உயிர் காவடியின் தண்டாக, அதன் இருபக்கங்களிலும் தொங்கும்.

யாவர்க்கும் உளவாய காமக்கடலும் அதை நீந்தும் அரணாகிய தோணியும் ஆகிய இரண்டில் எனக்கு உள்ளது காமக்கடலே; அதனை நீந்தும் தோணி இல்லை.

இன்பம் தருதற்குரிய நட்பில் துன்பம் செய்யவல்லவர், துன்பம் தருதற்குரிய பகைமையில் என்ன செய்வாரோ? (துயர் வருதலை நீக்கவேண்டிய காதலரே அதனைச் செய்யாது இருக்கின்றாரே என்று வருந்துவாள்.)

காதலருடன் கூடுதலால் காமம் தரும் இன்பம் கடல்போலப் பெரிதாம். காதலரிடமிருந்து பிரியும்போது காமம் செய்யும் துன்பம் அக்கடலினும் பெரிதாகும்.

காமமாகிய கடலை நீந்தியும் அதற்குக் கரைகாண என்னால் இயலவில்லை; கரைகாணாத அக்காலம் எல்லாரும் உறங்கும் அறை இருளாயது. அவ்விருளிலும் அதற்கு ஒரு துணையில்லாமல் நான் மட்டுமே உள்ளேன்.

இந்த இரவானது அறிவற்றது, இரங்கத்தக்கது. உலகத்துள்ள உயிர்களையெல்லாம் தானே உறங்கச்செய்தலால் அதற்கு என்னைத்தவிர வேறு துணையில்லை.

காதலரோடு நான் இன்புற்ற நாட்களிலெல்லாம் குறியவாய், அவரிடமிருந்து பிரிந்து வாடும் இந்நாட்களில் நெடியவாய்ச் செல்லுகின்ற இராக்காலங்கள் அக்கொடியாரது கொடுமைக்குமேலே கொடுமைசெய்கின்றன.

மனம்போலக் காதலர் உள்ள ஊருக்கு விரைந்து செல்லவல்லவையாயின் என் கண்கள் இவ்வாறு வெள்ளமாகிய தம் நீரை நீந்தமாட்டா; நீந்துதலைத்தவிர அவற்றிற்கு வேறு வழியில்லை.