22 भासांनी तिरुक्कुरल

இல்லற வாழ்வு வாழ்பவனென்று சொல்லப்படுபவன் அற இயல்பினை உடைய ஏனைய மூவர்க்கும் அவர் செல்லும் நல்ல நெறியில் நிலைபெற்ற துணையாவான்.

காப்பாற்றவேண்டிய உறவினர்களால் புறக்கணிக்கப் பட்டவர்க்கும் வறியவர்க்கும், ஆதரிப்பார் யாருமின்றித் தன்னிடம் வந்திருந்து இறந்து போனவர்க்கும் இல்லறத்தான் என்று சொல்லப்படுபவன் துணையாவான்.

தென்திசையார், தெய்வம், விருந்தினர், சுற்றத்தார், தான் என்று சொல்லப்பட்ட ஐவரிடத்தும் செய்யும் அறநெறியை வழுவாமல் செய்தல் இல்லறத்தானுக்குச் சிறப்புடைய அறமாகும்.

பொருள் செய்யும்போது பழிக்கு அஞ்சி, அதனை ஈட்டிப் பிறரோடு பகுத்துண்டு வாழும் வாழ்வை ஒருவன் மேற்கொள்வானாயின் அவனது அறவழி உலகில் எப்போதும் நிலைத்து நிற்றல் அல்லாமல் அழிதல் இல்லை.

ஒருவனது இல்வாழ்க்கை தன் இல்லாள்மேல் கொள்ளும் அன்பினையும், பிறரோடு பகிர்ந்து உண்ணும் அறத்தினையும் உடையதானால், அத்தகைய இல்வாழ்க்கை அதற்குப் பண்பும் பயனுமாகும்.

ஒருவன் தன் இல்வாழ்க்கையை அறவழியிலேயே நடத்துவானானால், அவன் அதற்குப் புறமாகிய வழியில் சென்று அடையும் பயன் யாது?

இல்லறத்தில் நின்று அதற்குரிய இயல்போடு வாழ்பவன் என்று சொல்லப்படுவோன் இல்வாழ்க்கையைத் துறக்க முயல்வார் யாவருள்ளும் சிறப்புடையவன்.

தவம் செய்வாரையும் அவரவர் நெறியில் வாழத்துணை செய்து, தானும் அறத்தில் வழுவாது வாழும் இல்வாழ்க்கை, தவம் மேற்கொள்வார் நிலையினும் மேம்பட்ட பண்புடையதாகும்.

இல்லறம், துறவறம் ஆகிய இரண்டில், நூல்களால் அறம் என்று சிறப்பித்துப் பேசப்படுவது இல்லறமே. துறவறமோ, பிறரால் பழிக்கப்படுவது இல்லையானால், இல்லறத்தோடு ஒத்த தன்மை உடையதாக ஏற்றுக் கொள்ளப்படும்.

இல்லறத்தை அதற்குரிய சிறப்போடு மேற்கொண்டு உலகில் வாழ்பவன், நிலவுலகில் உள்ளவனானாலும் விண்ணில் உறையும் தெய்வத்துள் ஒருவனாக வைத்து உயர்வாக எண்ணப்படுவான்.