22 भाषा मे तिरुक्कुरल

கண்ணால் கண்டும், செவியால் கேட்டும், நாவால் உண்டும், மூக்கால் மோந்தும், மெய்யால் தீண்டியும் துய்க்கப்படும் ஐம்புலன்களும் ஒள்ளிய வளையலணிந்த இவளிடம் உள்ளன.

பிணிகளுக்கு மருந்தாவன பிணிகளிலிருந்து வேறுபட்ட தன்மை உடைய பொருள்களாம்; ஆனால், இவ்வழகிய அணிகளை உடையவளால் உண்டாகும் நோய்க்கு அவளே மருந்தாவாள்.

தாம் விரும்பும் மகளிரின் தோளில் துயிலும் துயிலைக் காட்டிலும் தாமரைக் கண்ணானின் உலகம் இனியதாகுமோ?

தன்னைவிட்டு அகன்றால் சுடுவதும் தன்னை நெருங்கினால் குளிருவதும் ஆகிய தீயை இவள் எங்கிருந்து பெற்றாள்?

எப்பொழுதும் பெற்றுப் புணர்ந்தாலும் பூவணிந்த தழைந்த கூந்தலினை உடையவளுடைய தோள்கள், தாம் விரும்பும் பொருள்கள் விரும்பியபோது தாமே வந்து இன்பம் தருதல்போல் இன்பம்தரும்.

இவளைப் பெறாது வாடிய என் உயிர் பெறும்போதெல்லாம் தளிர்க்கும் வகையில் தீண்டுதலால், இவளுடைய தோள்கள் அமிழ்தினால் செய்யப்பட்டவையாகும்

அழகிய மாமை நிறம்கொண்ட பெண்ணின் தழுவல், தமக்குரிய இல்லத்திலிருந்து உலகத்தவர் தம்முயற்சியால் வந்த பொருளை யாவர்க்கும் பங்கிட்டுக்கொடுத்துத் தமது பங்கை உண்ணுவதுபோல்வது.

சற்றும் நெகிழாமையினால் காற்றால் இடையறுக்கப்படாத தழுவல், ஒருவரையொருவர் விரும்பும் காதலர் இருவர்க்கும் இனியதாகும்.

ஊடுதல், அதனை அளவறிந்து நீக்குதல், அதன் பின் நிகழும் புணர்ச்சி ஆகியவை காமத்தை இடைவிடாது பெற்றவர் அடையும் பயன்களாகும்.

சிவந்த அணிகலன்களை உடையவளை இடைவிடாது சேரச்சேர இவளிடம் வளரும் காதல், நூல்களாலும் நுண்ணுணர்வாலும் மேலும் மேலும் அறிய அறிய முன்னை அறியாமை கண்டாற்போலக் காணப்படும்.