22 भासांनी तिरुक्कुरल

அறத்தின் நுட்பத்தை அறிந்து, தன்னினும் மூத்த அறிவுடையாரது நட்பின் அருமையை உணர்ந்து, அதனை அடையும் திறம் அறிந்து, அவரைத் துணையாகக் கொள்ளல் வேண்டும்.

தனக்கு வரும் துன்பங்களைத் தக்க வழியறிந்து விலக்கி, அத்தகைய துன்பங்கள் மேலும் வராமல் தடுக்கவல்ல தன்மை உடையவரை மகிழ்வித்து ஒருவன் துணையாகக் கொள்ளுதல் வேண்டும்.

பெரியவர்களை மகிழ்விக்க வேண்டியவற்றை எல்லாம் செய்து தமக்குத் துணையாக்கிக் கொள்ளுதல் அரிய பேறுகள் எல்லாவற்றிலும் அரிதாகும்.

அறிவு முதலியவற்றால் தம்மினும் உயர்ந்தாரைத் துணையாகக்கொண்டு, தாம் அவர் காட்டிய வழியில் நடத்தல் வலிமைகள் யாவற்றிலும் தலையாய வலிமையாகும்.

அமைச்சர் தன் பணியைக் கண்போல் துணையாகக் கொண்டு நடத்தலால், அரசன் ஆற்றலுடைய அமைச்சரை ஆராய்ந்து தேர்ந்தெடுத்து, வழிகாட்டிகளாகக் கொள்ளவேண்டும்.

அறிவு, ஒழுக்கங்களால் தகுதி உடையவரைத் துணையாகக்கொண்டு, தானும் அறிவோடு, அறநெறிகளிலிருந்து வழுவாமல் நடத்தல் வல்ல அரசனுக்குப் பகைவர் செய்யக்கூடிய துன்பம் ஏதொன்றும் இல்லை.

தீயன கண்டபோதெல்லாம் இடித்து அறிவுரை கூறும் ஆற்றலுடைய அமைச்சர்களை இவர் நமக்குச் சிறந்தவரென்று துணையாகக்கொள்ளும் அரசரைக் கெடுக்கும் பெருமையுடைய பகைவர் உலகில் எங்கு உள்ளார்?

இடித்துரைத்துக் கண்டிக்க வல்லாரைத் துணையாகப் பெறாமையால் பாதுகாவலற்ற அரசன், தன்னைக் கெடுக்கும் பகைவர் இல்லையாயினும் தானே கெடுவான்.

முதலில்லாமல் வணிகம் செய்வார்க்கு அதனால் கிடைக்கும் ஊதியம் ஏதுமில்லை; அதுபோலத் தம்மைத் தாங்கும் துணையற்ற அரசர்க்கு அரசு பணியைச் சலியாது செய்யும் நிலை இல்லை.

அரசன் பெரியாரது துணையைக் கொள்ளாது விடுதல் பலரோடு பகைமை கொள்ளுதலைக் காட்டிலும் பலமடங்கு தீமை உடையதாகும்.