22 भासांनी तिरुक्कुरल

ஒரு பொருளாக யாராலும் மதிக்கப்படாதவரையும் மதிக்கப்படுபவராகச் செய்யவல்ல பொருளைத்தவிர ஒருவனுக்குப் பொருளாவது வேறு எதுவும் இல்லை.

எல்லாப் பெருமைகளும் உடையவராயினும் பொருளற்றவரை யாவரும் இகழ்வர்; எல்லாத் தீமைகளும் உடையவராயினும் செல்வரை யாவரும் மதித்துத் தாம் அவரிடம் தாழ்ந்து நிற்பர்.

பொருள் என்று எல்லாராலும் போற்றப்படும் அணையாத விளக்கு தன்னைச் சேர்ந்தவர்க்கு, அவர் நினைத்த நாட்டிற்கெல்லாம் சென்று, பகையென்னும் இருளை அழிக்கும்.

பொருள் சேர்க்கும் திறன் அறிந்து, தீச்செயல் மேற்கொள்ளாது வந்த பொருள் ஒருவனுக்கு அறத்தையும் கொடுக்கும்; இன்பத்தையும் அளிக்கும்.

அருளொடும் அன்பொடும் சேர்ந்து நல்ல நெறியில் வராத பொருளீட்டத்தை ஒருவன் ஏற்றுக்கொள்ளாமல் நீக்கிவிட வேண்டும்.

உரிமையுடையவர் இல்லாததாய்த் தானே வந்துசேரும் பொருளும், இறையாகக் கொடுக்கப் பட்ட சுங்கப்பொருளும், பகைவரை வென்று திறையாகக் கொள்ளப்பட்ட பொருளும் ஆகிய மூன்றும் அரசனுக்குரிய பொருள்களாகும்.

அன்பினால் பெறப்பட்ட அருள் என்னும் குழவி, பொருள் என்று பாராட்டப்படும் செல்வத்தையுடைய செவிலியால் வளரும்.

தன் கையில் பொருளிருப்பவன் ஒரு செயலை மேற்கொள்ளுதல், ஒருவன் மலைமேல் நின்றுகொண்டு யானைகள் போர்செய்வதைப் பார்ப்பதை ஒத்ததாகும்.

தம் பகைவரது தருக்கினை அழிக்கும், கூரிய படைக்கலம் செல்வத்தைப்போன்று வேறொன்றும் இல்லையாதலால் ஒருவன் பொருளைப் பெருக்க வேண்டும்.

நன்னெறியால் வரும் பொருளை மிகையாகச் சேர்த்தவர்க்கு அறம், இன்பம் எனும் பிற இரண்டும் எளிதில் அடையக்கூடிய பொருள்களாகும்.