22 भासांनी तिरुक्कुरल

இன்றியமையாச் சிறப்பினை உடையன ஆயினும் தம் குடிப்பிறப்பிற்குக் கேடு விளைவிக்கும் செயல்களைச் செய்தல் கூடாது.

புகழுொடு, மானத்தையும் நிலைநிறுத்த விரும்புவார் புகழ் தருவன ஆயினும் குடிப்பிறப்பிற் கொவ்வாத இழிவான செயல்களைச் செய்யமாட்டார்.

நற்குடிப் பிறந்தார்க்குச் செல்வம் பெருகும்போது யாவரிடமும் பணிவு வேண்டும்; சிறிதாய வறுமை உண்டாகும்போது மேலிருந்து கீழ்நிலைக்குத் தாழாத உயர்ச்சி வேண்டும்.

நற்குடியில் பிறந்த மாந்தர் தம் உயர்ந்த நிலையிலிருந்து கீழ்நிலைக்குத் தாழ்ந்து போவாராயின் தலையிலிருந்து கீழே விழுந்த மயிரினை ஒத்தவராவர்.

குடிப்பிறப்பால் மலைபோல் உயர்ந்தாரும் இழிவான செயல்களை ஒரு குன்றி அளவு செய்வாரானாலும் கீழ்நிலை அடைவார்.

ஒருவன் மானத்தைவிட்டுத் தன்னை அவமதிப்பார் பின்சென்று நிற்கும் நிலை புகழ்தராது; தேவர் உலகத்தும் செலுத்தாது. அது அவனுக்குச் செய்வது யாது?

தன்னை இகழ்வார்பின் சென்று, பொருள்பெற்று, ஒருவன் உயிர்வாழ்தலைக்காட்டிலும் ‘இறந்துவிட்டான்’ என்று சொல்லப்படுதலே நல்லது.

உயர்குடிப்பிறப்பின் சிறப்பாகிய மானம் அழிய நேரும்போது இறக்காமல் பயனற்ற உடம்பினைக் காக்கும் வாழ்வானது, பின்னும் இறவாதிருத்தற்கு மருந்தாகுமா? பின்னும் இறத்தல் உறுதியாகும்.

தன் உடலிலிருந்து ஒரு மயிர் நீங்கினும் உயிர்வாழாத கவரிமானை ஒப்பார், மானம் அழிய நேர்ந்தால் அதைத் தாங்காது உயிர்நீப்பர்.

தமக்கு இழிவு வரும்போது உயிர்வாழாது அதனை நீக்கும் மானம் உடையாரது புகழை உலகத்தார் எப்போதும் தொழுது போற்றுவர்.