22টি ভাষায় তিরুক্কুরাল

எளிதில் பகையுணர்வுகொள்ளும் அரசரைச்சேர்ந்து அவரிடம் பணி செய்வார், அவரிடமிருந்து பெரிதும் விலகுவதும் அவரை மிகவும் நெருங்கியிருப்பதும் செய்யாது தீக்காய்வார்போல இடைநிலத்தில் நிற்றல் வேண்டும்.

தாம் சேர்ந்தொழுகும் மன்னர் விரும்புவனவற்றைத் தாம் விரும்பாதிருத்தல் அவருக்கு மன்னரால் நிலைபெற்ற செல்வத்தைக் கொடுக்கும்.

அமைச்சர் தம்மைக் காத்துக்கொள்ள விரும்பினால் அரிய பிழைகளைத் தாம் செய்யாதிருத்தல் வேண்டும். அவ்வாறான பிழைகளை அமைச்சர் செய்தாரென்று அரசன் ஐயமுற்றால் அவனைத் தெளிவித்தல் யாவர்க்கும் கடின செயலாகும்.

சிறந்த அரசர் அருகில் இருந்தால் அவர் காணுமாறு இன்னொருவன் செவியில் கூறுதலையும், முகம்நோக்கிச் சிரித்தலையும் தவிர்த்தல் வேண்டும்.

அரசன் பிறரோடு மறைவாகப் பேசும்போது, எதனையும் செவிகொடுத்துக் கேளாது, அவனை அது பற்றி வினவுதலும் செய்யாது, அதனை அவனே மறைக்காது சொல்லும்போது கேட்க வேண்டும்.

அரசனிடம் பேசும்போது அப்பொழுது நிகழும் அவன் குறிப்பினை அறிந்து, சொல்லுதற்கேற்ற காலத்தையும் தெரிந்து, வெறுப்பில்லாதவற்றையும் வேண்டுவனவற்றையும் அவன் விரும்பும் வகையில் சொல்ல வேண்டும்.

பயனுடையவற்றையும் அரசன் விரும்புவனவற்றையும் அவன் கேட்கவில்லையாயினும் சொல்லி, எப்போதும் பயனற்றவற்றை அவன் கேட்டாலும் சொல்லாது விடுதல் வேண்டும்.

இவர் நம்மைவிட இளையவரென்றும், நமக்கு இன்ன உறவினை உடையவரென்றும் அரசரை அவமதியாது, அவரது உயர்நிலைக்கு ஏற்றவாறு நடத்தல் வேண்டும்.

நிலைபெற்ற அறிவினை உடையவர் அரசனால் நாம் நன்கு மதிக்கப்பட்டோம் என்றெண்ணி அவன் விரும்பாதவற்றைச் செய்யமாட்டார்.

அரசனுக்கு யாம் நீண்டகாலமாகப் பணி செய்கிறோம் என்றெண்ணிப் பண்பற்றவற்றைச் செய்யும் உரிமை அமைச்சர்க்குக் கேடு பயக்கும்.